ABC-ja e kreshnikisë

Vasili me Veselin ishin shokë. Shokë që në vogëli - ngrohur më një diell, lagur më një ujë. Pastaj erdh puna që Veseli vrau Vasilin edhe Vasili vrau Veselin. Që të dy ia dhanë flakë më flakë, si trima të ndjerë që na nderojnë vendin e kombin kombëtar kreshnik.

Puna rrodhi kësilloj:

Vasili me Veselin rrinin në një hije edhe bisedonin. Aty pranë ish lumi. Pranë lumit një plep. Vasili tha:
- Hajde plep, hajde, që të mbolli dora e Krishtit!

Veseli tha:
- E ke keq, or mik, e mbolli dora e Muhametit!

- E Krishtit!
- E Muhametit!

E filluan si me të qeshur po doli e ngjeshur se sikush gojën e kish të tijën edhe me bukë e ushqente. Po përveç gojës, kishin edhe kobure në brez, si çdo shqiptar i vërtetë.

- Plepin e mbolli Krishti!
- Plepin e mbolli Muhameti!

Pak-pak! koburet kreshnike, flakë më flakë!
E që të dy u vranë!

Njëri për plepin e Krishtit, tjetri për plepin e Muhametit...