Tiranë: Qeveria drejt ligjit për financimin e institucioneve fetare

Kryeministri Sali Berisha kërkoi sot hartimin sa më të shpejtë të ligjit për financimin e OJQ-ve fetare në Shqipëri. Në mbledhjen e sotme të qeverisë, kreu i saj Berisha u ndal tek marrëveshje e nënshkruar rreth një muaj më parë mes qeverisë dhe OJQ-ve fetare.

“Kjo marrëveshje historike rregullon marrëdhëniet e shtetit me këto komunitete dhe përcakton qartë se shteti duhet të miratojë një ligj lidhur me financimin e misioneve fetare" - theksoi kryeministri.

Berisha tha se prej dy vitesh është krijuar një fond në Ministrinë e Kulturës, i cili synon restaurimin e trashëgimisë fetare.

"Në projektin e Bankës Botërore për zhvillimin e bregut, përfshihet edhe restaurimi i një seri institucionesh të kultit dhe unë mendoj se ky zë në buxhetin e shtetit duhet të jetë konstant dhe i vazhdueshëm"- tha më tej Berisha.

Ai ka kërkuar që ligji të rregullojë detyrimin e shtetit për të financuar besimet fetare në Shqipëri."Të gjitha vendet e lira kanë zhvilluar mekanizmat e financimit të këtyre institucioneve, duke mos krijuar asnjë lloj varësie"-vijoi shefi i qeverisë.

Në këtë drejtim, Kryeministri garantoi se "Qeveria shqiptare do t’i qëndrojë plotësisht këtij parimi, në shenjë respekti ndaj besimeve fetare në Shqipëri, si dhe ndaj taksapaguesve shqiptarë".