Tiranë: Presidenti kërkon xhami për anëtarët e KMSH-së

Presidenti Bamir Topi e sheh si të domosdoshëm ndërtimin e një xhamie të re në Tiranë, për të shmangur faljen demonstrative në shesh kur në Tiranë zbresin islamikë shqipfolës nga i gjithë rajoni me rastin e festave abrahamike.

Gjatë vizitës në zyrat e OJF-së "Komuniteti Mysliman i Shqipërisë", presidenti i Republikës mbështeti kërkesat e kësaj organizate për një xhami të re të madhe, pranë qendrës së Tiranës.

“Unë nuk do të dëshiroja që vitet që vijnë, të na bëjnë të shikojmë besimtarë, të cilët falen trotuareve apo rrugëve. Kështu që unë u bëj thirrje të gjithëve pa përjashtim, të kontribuojmë së bashku që edhe Komuniteti Mysliman këtu në Tiranë, në një qytet që rritet e rritet, të ketë edhe ai xhaminë e tij, institucionin e tij, që të ushtrojë, të predikojë, të falet brenda institucionit”, - tha Topi.