Tiranë: Islamikët provokim kundër arsimit publik

“Ministria e Arsimit ka rënduar situatën e vajzave me shami”
26/04/2009 - 13:38

Kanë reaguar lidhur me faktin e përsëritur tashmë të përjashtimeve nga shkolla të nxënësve besimtare myslimane për shkak të veshjes me shami, ndërkohë që e kanë konsideruar dhe tepër rënduese situatën e krijuar nga deklaratat e Ministrisë së Arsimit për moslejimin e këtyre të fundit në shkolla. Grupi Shqiptar i të Drejtave të Njeriut, një grup shoqatash myslimane dhe disa organizata të tjera të shoqërisë civile që veprojnë në mbrojtje të lirive dhe të drejtave të njeriut në Shqipëri, janë shprehur se kanë ndjekur me shqetësim faktin se dy besimtare myslimane, nxënëset Florida Kola dhe Artenisa Neziri, nga qyteti i Burrelit janë përjashtuar nga shkolla për shkak të veshjes së tyre me shami.

"Shqetësimi bëhet edhe më i madh për faktin se flakja jashtë institucioneve arsimore dhe administrative të vendit të besimtareve dhe besimtarëve të fesë islame për shkak të mbajtjes së shamisë e mjekrës, është bërë tashmë një çështje e përsëritur për të disatën herë. Situatën e krijuar e ka rënduar edhe më tepër reagimi zyrtar i Ministrisë së Arsimit e Shkencës, e cila deklaroi zyrtarisht se, 'vajzat e mbuluar me shami apo me simbole të tjera fetare nuk duhet të lejohen në shkolla' dhe se 'shkolla është laike e të gjithë nxënësit aty duhet të jenë të barabartë, pavarësisht bindjeve apo besimeve fetare'".

Sipas tyre, Shqipëria është anëtare e OKB-së dhe e OSBE-së, duke ratifikuar pothuajse të gjitha konventat kryesore të këtyre organizatave lidhur me mbrojtjen e të drejtave të njeriut, ndërkohë sipas Kushtetutës, "një marrëveshje ndërkombëtare e ratifikuar me ligj ka epërsi mbi ligjet e vendit që nuk pajtohen me të".

Duke u bazuar në argumente, këto shoqatat theksojnë se, "duket krejt absurde që rregulloret e një shkolle, këshillit akademik të ndonjë universiteti apo drejtorie arsimore, të kenë fuqi mbi ligjin themelor të shtetit".

Ata i bëjnë thirrje Presidentit të Republikës si garant i Kushtetutës, që të sigurojë respektimin e të drejtës së besimit fetar.

ndiq nyjen