Tiranë: 75 OJF kundër regjistrimit fetar të popullsisë

Qeveria greke falenderon Pollon, akuzon nacionalistët shqiptarë për shtyrjen e regjistrimit

Si të ishte një parti politike shqiptare që interesohet dhe mban qëndrime për çdo çështje në vend, Athina zyrtare, duke ndërhyrë hapur në punët e brendshme të Shqipërisë, deklaron se shtyrja e regjistrimit të popullsisë ishte një vendim i paarsyeshëm.

Por, zëdhënësi i Ministrisë së Punëve të Jashtme të Greqisë Jorgos Dhelavekuras, ka falënderuar dhe ka shprehur mirënjohjen e thellë për ministrin Genc Pollo, i cili ka premtuar një regjistrimin popullsie të atillë që garanton manipulimin e kombësisë shqiptare si dhe rrit artificialisht numrin e minoritarëve grekë në Shqipëri.

“Në çdo rast, shënojmë me kënaqësi, premtimin e ministrit përkatës, i cili paralelisht është edhe kryetari i Komisionit Qendror të Regjistrimit, që qeveria shqiptare vijon të mbështesë zhvillimin e regjistrimit, me pyetësor ku do të përfshihen edhe pyetjet e sipërpërmendura jo të detyrueshme. Është e vetëkuptueshme që do të vijojmë të ndjekim situatën”, u shpreh Jorgos Dhelavekuras.

Genc Pollo, i njohur si mbështetës i hershëm i projektit për greqizimin e jugut të Shqipërisë, tashmë mbetet shpresa e vetme e Athinës zyrtare për regjistrimin e popullsisë mbi baza etnike dhe fetare. Jo rastësisht, në radhët e ministrave të qeverisë Berisha, Ministri për Inovacionin dhe Teknologjinë e Informacionit, Genc Pollo, ka shfaqur zellin më të madh për të marrë përsipër procesin e regjistrimit të popullsisë.

Angazhimi i Pollos për të kryer këtë proces, i cili synon greqizimin e jugut të vendit, sqarohet vetëm po t’i referohemi prejardhjes filogreke të familjes së ministrit dhe lidhjeve të tij të ngushta me udhëheqësit grekë. Veç kësaj, gjyshi i Genc Pollos, Themistokli Pollo, i njohur si Take Pollo, ka qenë oficer i ushtrisë vorio-epirote në vitet 1914-1917, me gradën kapiten, ku ka djegur 27 fshatra në jug të Shqipërisë si dhe ka vrarë rreth 500 shqiptarë.

Me sa duket, është kjo lidhje e ministrit me grekët dhe paranojat e ‘97 se e rrëzuan grekët nga pushteti, që Berisha është kaq i përulur para interesave greke.

ndiq nyjen

Regjistri mbi fenë s’mund të bëhet nga një shtet asnjanës

Korçë – Mbledhja e firmave kundër regjistrimit të popullsisë mbi baza etnike dhe fetare ka vijuar të premten në qytetin e Korçës.

Aleanca Kuq e Zi po mbledh prej ditësh firma kundër propozimit të qeverisë për regjistrimin. I pranishëm në këtë takim, ishte edhe nënkryetari i KLD-së, Kreshnik Spahiu, një nga iniciatorët kryesor.

“Ne mendojmë dhe besojmë se rregullimet ligjore të kësaj çështjeje janë të tilla që nuk japin garanci për të mbrojtur, as të drejtat e kombit shqiptar, as të drejtat e minoriteteve apo komuniteteve fetare, as të tilla që të mund të japin garanci për rezultatet e tyre dhe prandaj kemi ndërmarrë apo mbështesim inisiativa për t’i ndryshuar ato, për t’i hapur në këtë mënyrë rrugë një zgjidhjeje të përshtatshme dhe që të mbrojë të drejtat e shumicës dhe të pakicës në shtetin Shqiptar, të drejtat e çdo qytetari të tij”, ka thënë ai.

Sipas tij, një regjistrim mbi baza fetare nuk ka arsye të bëhet nga një shtet asnjanës në çështjet fetare.

ndiq nyjen