Tetovë: Shkolla e mesme ndalon simbolet fetare

Drejtori i shkollës së mesme "8 shtatori" në Tetovë, Latif Ismaili, në bazë të rregullores së brendshme të shkollës ka ndaluar simbolet fetare në mjediset shkollore, masë që ka prekur një nxënëse myslimane e cila refuzon të heqë shaminë duke kërkuar të shkelë rregulloren e shkollës.

K. Etemi nga Tetova është nxënëse e vitit të parë në shkollën e mesme ekonomike "8 shtatori" dhe shamia e saj, si simbol fetar mysliman bie ndesh me rregulloren, drejtorinë dhe pjesën më të madhe të profesorëve në këtë institucion arsimor.

"Sa herë që unë kam ardhë nuk më kanë leju të hyjën në orë dhe ti mbajë mësimet rregullisht. Gjithmonë kam tentu të hy në orë, mirpo ata përsëri më kanë thënë se nuk ështe lejuar në klasë të hyjë me shami. Në fillim nuk kishte probleme, tani ka fundi filluan edhe problemet tjera nëpërmjet nxënësve, ata filluan të më thonin nuk ke ti drejtë të qëndrosh pasi që je e mbuluar. Një orë jashtë një orë brenda, asnjëherë nuk e kam bërë mësimin rregullisht. Me kujdestaren e klasës shumë rrallë jemi pa edhe kemi bisedu për këtë, ajo këtë temë ia ka lënë më shumë drejtorit", tregon nxënësja Kaltrina Etemi.

"Ne nuk do ta tolerojmë atë dhe ajo lirisht mund t'i merr dokumentet. Në Tetovë kemi shkollë fetare ku atje është rreptësisht e ndalura hyrja pa shami. Në anën tjetër, nëse nxënësja Kaltrina dëshiron të ndjek shkollën ne i kemi thënë se ne nuk të përzihemi jashtë shkolle t'i çafrë mban, në klasë do të qëndrosh si qëndrojnë të gjitha shoqet e saja në klasë ku mëson edhe Kaltrina. Unë nuk pajtohem dhe lirisht edhe nepërmjet mjeteve të informimit i bëj apel prindërit prej sot të vijë t'i merr dokumentet dhe ta conë në një shkollë tjetër, në shkollën ekonomike nuk do ta tolerojmë", thotë drejtori i sh.m "8 shtatori", Latif Ismaili.