Shkencë: Hidhet hapi i parë drejt teletransportit

Dy grupe shkencëtarësh nga universitetet e Merilendit dhe Miçiganit në SHBA, kanë vërtetuar se teletransporti nuk do të jetë dhe për shumë kohë thjesht ëndërr. Ata arritën të teletransportojnë karakteristikat e një atomi A në një tjetër atom B në largësi 1 metër.

Atomi A është sjellë në gjendje kuantike duke e bombarduar me impulse mikrovalësh. Më pas, atomet janë goditur me impulse lazer, duke lëshuar secili nga një foton. Fotoni A i ardhur nga atomi ne gjendje kuantike kishte informacion të ndryshëm nga fotoni B në gjendje jo kuantike.

Pas këtij eksperimenti, shkencëtarët zbuluan se atomi B kishte fituar vetitë e atomit A. Kjo është përmbledhja e thjeshtuar e eksperimentit.

“Në të shkuarën ishin përftuar dukuri teletransporti mes fotoneve dhe atomeve, por gjithmonë me ndërhyrjen e një elementi të tretë nga jashtë. Këtë herë teletransporti është i pastër dhe i realizuar nga dy atome pa asnjë ndihmë”, shprehet shkencëtari Kristofer Monro.

Rezultati i këtij studimi është publikuar në revistën “Science” dhe, sipas studiuesve, kjo i hap rrugën ndërtimit të rrjeteve me memorie të lartë kuantike.

Gjithashtu, zbulimi mund të ndihmojë në ndërtimin e kompjuterave të ardhshëm kuantikë. Këta lloj kompjuterash jo vetëm që mund të jenë shumë herë më të fuqishëm se ata që përdorim aktualisht, por edhe shumë herë më të shpejtë.