Prishtinë: Thaçi e Tërnava nderojnë masakruesin e shqiptarëve

Kryeministri i Republikës së Kosovës, Hashim Thaçi, dhe kreu i organizatës abrahamike "Bashkësia Islame e Kosovës", Naim Tërnava, kanë përuruar sot në praninë e kryeministrit të Turqisë, Reçep Erdogan, xhaminë e restauruar që mban emrin e sulltanit Mehmet Fatih, armik dhe masakrues i shqiptarëve në periudhën e Lidhjes së Lezhës.

Në këtë ceremoni antishqiptare, veç pjesëmarrësve zyrtarë morën pjesë dhe një numër i konsiderueshëm njerëzish që, sipas shtypit, "e përshëndetën ngrohtësisht kryeministrin turk, Erdogan, dhe atë të Kosovës Thaçi".

Kryeministri turk me këtë rast ka shprehur gjithashtu gatishmërinë e qeverisë së tij për të investuar në restaurimin e monumenteve të tjera simbole të pushtimit turk mbi shqiptarët dhe Shqipërinë, të cilat, siç u shpreh ai "janë pasuri e përbashkët dhe si të tilla duhen të trajtohen në mënyrë meritore".

Restaurimi i kësaj xhamie famëkeqe dhe simbol të antishqiptarisë është bërë me financimin e Agjencisë Turke për Zhvillim dhe Bashkëpunim Ndërkombëtar (TIKA). Sipas palës turke xhamia është ngritur për herë të parë në vitin 1461, pikërisht gjatë luftës së përgjithshme shqiptare kundër pushtimit turk nën drejtimin e heroit kombëtar Gjergj Kastriotit.