Prishtinë: Të futet paganizmi ilir dhe ateizmi në xhami dhe medrese

Duket se kërkesa e OJQ-së "Bashkësia Islame e Kosovës" për futjen e fesë si lëndë mësimore në arsimin publik ka shkaktuar reagime mes mbështetësve të paganizmit ilir dhe ateistëve shqiptarë të cilët kanë filluar të dëgjohen gjithnjë e më shpesh në hapësirat e internetit.

Paganët dhe ateistët shqiptarë si kundërpërgjigje ndaj kërkesës së organizatës abrahamike "Bashkësia Islame e Kosovës", kërkojnë që në xhamitë dhe medresetë e Kosovës të futen si lëndë mësimore me detyrim paganizmi ilir dhe ateizmi, të cilat ata i konsiderojnë si vlera që zhvillojnë kulturën shqiptare dhe që e mbrojnë atë nga "fetë aziatike" sipas tyre.

"Kështu, sigurojmë se brezat e rinj të shqiptarëve nuk do të indoktrinohen me ideologji dhe dogma aziatike dhe nuk do të cenohet e ardhmja e tyre, por do të rriten me traditë dhe vlera shqiptare", vazhdon reagimi.

Kërkesa e mëparshme e organizatës abrahamike "Bashkësia Islame e Kosovës" kishte hasur dhe ajo në pakënaqësinë e ateistëve përpos që dhe kishte rënë në veshin e shurdhër të institucioneve të Prishtinës.

Ateistët kishin reaguar herën e parë duke thënë se nëse futej feja në arsimin publik, atëherë duhej futur dhe ateizmi dhe antiteizmi (ideologji antifetare) si lëndë mësimore nëpër xhamitë dhe medresetë e Kosovës.