Prishtinë: Funksionaret e shtetit kundër fesë në shkolla

Në një letër-peticion të përbashkët drejtuar kreut dhe deputetëve të Kuvendit, funksionare të shtetit dhe aktiviste të organizatës për të drejtat e grave shprehin kundërshtimin e tyre me ndryshimin e përfolur të Ligjit për arsimin parauniversitar, sipas të cilit do të lejohej përdorimi i simboleve fetare dhe futja e lëndës së fesë në programin mësimor të shkollave publike.

Gratë intelektuale dhe aktiviste, amendamentet e propozuara nga 27 deputetë të Kuvendit, për ndryshim të nenit 3, paragrafi 7 të Ligjit për arsimin parauniversitar, si dhe për shtimin e një paragrafi të ri në nenin 3 të këtij ligji, i shohin si të karakterit fetar si dhe si ndërhyrje të fesë në arsimin publik.

"Në bazë të informacionit të publikuar në media, jemi njoftuar se janë bërë dy propozim amendamente të mbështetura nga 27 deputetë të Kuvendit të Kosovës, për modifikimin e nenit 3, paragrafi 7 të Ligjit për Arsimin Parauniversitar, si dhe për shtimin e një paragrafi të ri në nenin 3 të këtij ligji.

Këto dy propozim-amendamente janë të karakterit fetar dhe synojnë legalizimin e përdorimit të shamijave në shkolla si dhe futjen e lëndës së Edukatës Fetare dhe Morale në planprogramet mësimore.

Duke u nisur nga fakti se Kosova është shtet laik i definuar me kushtetutë si dhe duke marrë parasysh se kombi shqiptar me tri religjione është mbajtur unik duke i dhënë rëndësi kombit para fesë, ne intelektualet dhe aktivistet për të drejtat e grave kërkojmë nga ju si përfaqësues të popullit që t`i mbroni me vendosmëri vlerat shtetërore dhe kombëtare duke votuar kundër amendamenteve të propozuara.

Për më tepër, ne konsiderojmë se legjislacioni në fuqi i Republikës se Kosovës garanton te gjitha liritë fetare sipas standardeve evropiane, prandaj nuk ka nevoje të ndryshohet.

Mbetemi të bindura se Kuvendi i Kosovës do të dal në mbrojtje të vlerave tona shtetërore, kombëtare e demokratike, ashtu siç i kemi mbrojtur edhe në sfida më të rënda."

Letra është nënshkruar nga 53 vetë, mes të cilave dhe zv/kryeministrja Edita Tahiri dhe ministrja e Integrimit, Vlora Çitaku.