Norvegji: Vazhdon djegia e kishave dhe në 2010

Kisha 148-vjeçare e Hëynefosit, Norvegji është shembur tërësisht nga zjarri ditën e martë. Skeleti prej druri ishte përfshirë krejt nga flakët kur arritën njësitë zjarrfikëse.

Kisha ishte pajisur me alarm kundër vjedhjes, por nuk kishte alarm kundër zjarrit, ndërsa ishte planifikuar që të vendosej një i tillë ditën e sotme, sipas agjencisë NRK.

Shkaqet e zjarrit nuk janë përcaktuar ende, por dihet se ai ka nisur rreth orës 5 pasdite. Kishat norvege, sidomos ato të ndërtuara në shekujt e kaluar, kanë struktura prej druri që i bën pre të lehta të zjarrit.

Zjarret kundër kishave në Norvegji kanë tashmë histori 20-vjeçare, duke nisur me zjarrvëniet e bujshme në fillimvitet '90, nga skena antikristiane e muzikës Black Metal që e konsideron fenë kristiane si ideologji të imponuar kundër kombit norveg, e duke vazhduar deri në ditët e sotme.