Ministri i Arsimit: Jashtë feja nga shkollat

"Vajzat e mbuluara me shami apo me simbole të tjera fetare, nuk duhet të lejohen në shkolla", ka deklaruar dje për mediat gjatë një vizite në mjediset e shkollës "Arben Broci", në Tiranë, ministri i Arsimit dhe Shkencës, Fatos Beja, duke dalë kështu zyrtarisht në krah të institucioneve arsimore për pezullimin e nxënësve që shkelin rregulloren shkollore.

Kreu i Arsimit la të kuptohet se nëse ka të rinj që nuk pranojnë kushtet e shkollës publike, mund të largohen duke ushtruar të lirë besimin e tyre nëpër medrese. Polemikat artificiale të krijuara nga disa myslimanë në lidhje me çështjen, kanë hasur në shpërfilljen e opinionit të gjerë, ndërsa institucionet arsimore kanë mbajtur që në fillim një qëndrim të qartë për laicitetin e shtetit dhe të arsimit publik.