Londër: Ateistët kërkojnë arrestimin e papës

Dy autorët ateistë Riçard Doukinsi dhe Kristofer Hiçensi kanë kërkuar nga avokatët të ngrenë një çështje ligjore kundër papës Benedikt ku i fundit akuzohet për mbulimin e abuzimit seksual të fëmijëve në Kishën Katolike.

Autorët mendojnë të shfrytëzojnë të njëjtin parim që u përdor për arrestimin e diktatorit kilian, Augusto Pinoçet, gjatë një vizite të tij në Angli në vitin 1998.

Papa u bë pjesë e skandaleve, që kanë shpërthyer muajt e fundit rreth pedofilisë në Kishën Katolike, pas daljes në publik të një letre në të cilën pohonte se më parë vjen imazhi i Kishës e mandej abuzimet mbi fëmijët.

Sipas agjendës zyrtare, papa do të zhvillojë një vizitë treditore në Angli nga data 16 në 19 shtator, në Londër, Glasgou dhe Koventri ku do të shenjtërojë dhe kardinalin Xhon Njuman, teolog i shek. XIX.

Ndërkaq Doukinsi e Hiçensi pohojnë se papa nuk mund të mbrohet me imunitet diplomatik nga kërkesa për arrest, pasi megjithëse vizita e tij është e karakterit zyrtar, Vatikani nuk njihet si shtet nga OKB-ja ndaj dhe nuk përfiton imunitet diplomatik.

Dy autorët ateistë kanë marrë për avokat Xhefri Robertsonin dhe ndihmës të tij Mark Stivensin, për vendosjen e masave ligjore kundër papës. Avokatët mendojnë të veprojnë në tre drejtime, t'i kërkojnë Prokurorisë të nisë procedurat penale kundër papës, të ndërmarrin nismë popullore kundër tij, ose ta dërgojnë çështjen në Gjykatën Penale Ndërkombëtare.

Doukinsi pohon se "Kemi të bëjmë këtu me një njeri që mendimi i tij i parë, kur priftërinjtë e tij u kapën pa pantallona, ishte të mbulonte skandalin dhe të dënonte viktimat të heshtnin."

Hiçensi shton se "Ky njeri nuk është mbi ligjin. Fshehja institucionale e përdhunimit të fëmijëve përbën krim në çfarëdo ligji dhe nuk zgjidhet me ceremoni private e pendime në formë të hollash në kishë, por përmes drejtësisë dhe dënimit."

Në lidhje me arrestime të kësaj natyre në Angli, vitin e kaluar veprimtarë pro-palestinezë arritën të bindin gjykatën të lëshonte urdhër arresti për Xipi Livnin, politikanen izraelite, për vepra penale të kryera gjatë përleshjeve të Gazës në vitet 2008-2009. Urdhri u tërhoq pasi Livni anuloi vizitën e saj në Angli.

"Mundësia e ndjekjes ligjore të papës është më se reale", thotë avokati Stivens. "Bashkë me Xhefrin kemi arritur në përfundimin se Vatikani nuk përbën shtet në të drejtën ndërkombëtare. Ai nuk njihet nga OKB-ja, nuk ka kufij të mbrojtur dhe marrëdhëniet nuk i ka të karakterit të mirëfilltë diplomatik".