Kinë: Shpendët vijnë nga dinozaurët, pohojnë fosilet e reja

Zbulimi i pesë fosileve të reja dinozaurësh në Kinë konfirmon tezën se shpendët kanë evoluar nga dinozaurët, pohojnë shkencëtarët kinezë që kanë kryer zbulimin.

Fosilet e gjetura kanë struktura puplore ose të ngjashme me to, dhe rasti më i qartë mes tyre tregon praninë e katër krahëve dhe të këmbëve me pupla të dendura.

Zhu Zing, njëri prej shkencëtarëve pjesëmarrës në zbulim, do të sjellë hollësi të mëtejshme në Bristol në takimin e përvitshëm të Shoqatës së Paleontologjisë Kërbishtore.

"Këto gjetje të veçanta fosilesh na japin provat që na mungonin deri më tash", pohon Zhu Zingu. "Tashmë çdo gjë shkon në vendin e vet dhe lidhet me njëra-tjetrën."

Gjetjet datojnë deri në 151 milionë - 164 milionë vjet më parë duke qenë kështu më të hershme se dhe arkeopteriksi që mendohej si shpendi më i vjetër.

"Fosilet japin konfirmimin se hipoteza e dinozaurit-shpend është e saktë dhe gjithashtu mbështet idenë se shpendët kanë ardhur nga dinozaurët teropodë (grupi i grabitqarëve që përfshin alozaurët dhe velociraptorin)" - shton Zhu Zingu, nga Pekini.

Fosilet u zbuluan në krahinën e Liaoninit. "Ajo që të trondit është fakti se ishin të mbuluar me pupla kudo përveç sqepit dhe kthetrave," - pohon Zingu, duke përfunduar, - "është lloji i parë me pupla i njohur deri më tani, lloji më i hershëm me pupla. Çështja e parë për ne ishte a ishte fosile autentike, apo ndonjë truk, por pasi e shyrtuam me imtësi jemi të bindur se kemi të bëjmë me një lloj të vërtetë... Më të rëndësishmin për kuptimin e prejardhjes së shpendëve."

Fosilet do t'i ndihmojnë shkencëtarët të kuptojnë dhe anën mekanike të fluturimit të këtyre shpendëve parakë. Gjedhet janë njoftuar si tipe të Anchiornis huxleyi-t. Hollësi të mëtejshme rreth tyre do të botohen në revistën "Nature".

Pamje: ndiq nyjen