Japoni: Energji elektrike nga Hëna

Ndërtuesit japonë "Shimizu" kanë hedhur hapin e parë të projektimit të stacioneve elektrike në... Hënë. Sipas njoftimit në faqen e ndërmarrjes në internet, "Shimizu" synon të përdorë teknologji të përparuara hapësinore për vendosjen e paneleve diellore në sipërfaqen e Hënës me anë të robotëve.

Projekti, i pari i këtij lloji në rang bote, mban emrin "Unaza e Hënës" dhe përfshin krijimin e një "rripi diellor" për 11'000 km përgjatë ekuatorit të Hënës. Rripi i shtruar me panele për grumbullimin e energjisë diellore do të ketë gjerësi fillestare disa km për t'u zgjeruar më vonë në 400 km në të dy anët e vijës ekuatoriale të satelitit.

Përcjellja e energjisë nga panelet do të bëhet me kabllo drejt stacioneve mbledhje-përçuese që me radhën e vet do ta dërgojnë atë drejt Tokës me antena me mikrovalë. Marrësit në Tokë do të jenë rektena të vendosura në pika të ndryshme të rruzullit, të cilët do të drejtojnë gjithashtu rrezatimin mes dy trupave qiellore me sinjalizim të posaçëm.

Projekti parashikon dhe transportin e mjeteve përgjatë ekuatorit të Hënës, si për ngritjen ashtu dhe për mirëmbajtjen e rripit diellor. Kabllot elektrikë do të vendosen nën rrugët transportuese që do të shtrohen për këto arsye.

Sakaq, panelet diellore që do të instalohen në satelitin tonë parashikohen të prodhohen në Hënë me lëndën e parë të saj në stacionet e atjeshme elektrike. Stacionet, madje, do të lëvizin automatikisht gjatë prodhimit të paneleve dhe instalimit të tyre përgjatë vijës ekuatoriale.