Francë: Ferexhetë ndalohen me ligj

Në Francë ka hyrë në fuqi ligji për ndalimin e mbajtjes së ferexhesë në vendet publike nga gratë myslimane.

Për gratë që shkelin ligjin parashikohet gjobë 150 EUR dhe pengesë ligjore për marrjen e shtetësisë franceze, ndërsa për meshkujt që detyrojnë gratë të mbajnë ferexhe parashikohet nga gjobë deri në burgim.

Mbështetësit e ligjit pohojnë se është një masë e domosdoshme për arsye sigurie publike si dhe të barazisë gjinore, ndërsa masa ka dhe miratimin e publikut të gjerë.

Në Francë jetojnë rreth 6 milionë myslimanë, që përbëjnë dhe komunitetin më të madh mysliman në Evropë, dhe pjesa më e madhe e tyre vijnë nga veriu i Afrikës.

Ndërkaq, dje janë arrestuar dy protestuese myslimane gjatë një proteste kundër ndalimit të ferexhesë, por sipas policisë arrestimi është bërë pasi protesta ishte e paligjshme.