Egjypt: Kristianë e myslimanë djegin shtëpitë

Kristianë e myslimanë iu kanë vënë flakën shtëpive dhe shitoreve të njëri-tjetrit pranë qytetit Nagaa Hamadi të Egjyptit, ditën e shtunë, tre ditë pasi një i armatosur vrau 6 kristianë në rrugë, sipas njoftimit të shërbimeve të sigurisë.

"Katër shtëpi dhe një shitore, pronë e kristianëve, u kallën në flakë nga myslimanët, ndërsa katër shitore myslimane u kallën nga kristianët", vazhdojnë burimet. Si pasojë e zjarreve u plagosën 6 persona të të dy feve.

Policia ka vijuar duke marrë 46 deponime nga kristianët dhe myslimanët e zonës, të cilët akuzojnë njëri-tjetrin se pala tjetër ishte ajo që nisi e para zjarrvënien.

Vrasja që duket se ka ndezur zjarrin e radhës, ndodhi gjatë mesnatës së krishtlindjeve koptike ditën e mërkurë ndërsa të dy grupimet fetare vijuan me protesta të enjten dhe të premten. Policia arrestoi 25 prej protestuesve.