Durrës: Islamikët kërcënojnë bashkinë për ekspozitën

Hapja e një ekspozite, në të cilën kishte dhe figura nudo të punuara në dru, duket se ka zemëruar anëtarët e organizatës abrahamike "Komuniteti Mysliman i Shqipërisë", dega Durrës. Kreu i kësaj organizate për Durrësin është shprehur se do të padisë bashkinë e qytetit, e cila ka lejuar hapjen e ekspozitës.

Ekspozita është hapur në Galerinë e Arteve të Durrësit, që gjendet ngjitur me xhaminë e KMSH-së.

Redi Quku, kryetar i KMSH-së për Durrësin, është shprehur se ekspozita e piktorit dhe skulptorit Mustafa Biduli është e papranueshme. Ai ka thënë se bashkia ka prishur marrëveshjen, sipas së cilës kjo ekspozitë nuk do të hapej në këto ambiente pranë xhamisë.

Për më tepër, sipas tij, "kjo është një fyerje për besimtarët myslimanë", pasi ekspozita është hapur gjatë muajit të tyre "të shenjtë".