Bosnjë: Policia aksion kundër terroristëve islamikë

Policia e Bosnjë-Hercegovinës ka bastisur sot disa shtëpi në verilindje të vendit pas dyshimeve për veprimtari terroriste nga grupet islamike.

Sipas prokurorisë bastisjet janë kryer në territorin e Kalesisë, pranë Tuzlës, me qëllim zbulimin dhe parandalimin e veprimtarive në lidhje me terrorizmin dhe përgatitjen e veprimeve terroriste. Gjatë këtij aksioni janë gjetur materiale që janë mbledhur në cilësinë e dëshmisë, transmeton agjencia e lajmeve STA.

Në këtë republikë ish-jugosllave në dhjetor të vitit të kaluar janë ngritur akt-padi kundër gjashtë islamikëve për vepra terroriste që kulminuan me sulmin kundër rajonit të policisë në Bugojno, ku një efektiv i policisë humbi jetën dhe shumë të tjerë u plagosën.