Afganistan: 8 të vdekur nga protesta kundër djegies së "Kuranit"

Afganistan, 1 prill, NOA – Policia afgane thotë se të paktën tetë punonjës të huaj të OKB-së u vranë në Afganistanin verior, pasi një protestë kundër djegies së "Kuranit" u shoqërua me akte dhune.

Sulmi ndodhi në kryeqytetin e provincës Balk, Mazar-e-Sharif. Zyrtarët afganë thanë se demonstruesit sulmuan ndërtesën e OKB-së gjatë protestave kundër djegies së "Kuranit" para disa muajsh nga një prift amerikan në Florida, SHBA.

Qindra protestues dolën nëpër rrugët e Mazar-e-Sharif pas lutjeve të së premtes. Protesta mori drejtim të dhunshëm jashtë zyrave të OKB-së. Zyrtarët afganë thanë se mes të vrarëve ishin pesë roje nepaleze të OKB-së.

Demonstrata kundër djegies së Kuranit u zhvilluan edhe në kryeqytetin e vendit Kabul, dhe në qytetin veriperëndimor të Heratit, ku protestuesit thërrisnin sllogane anti-amerikane.